Dyfishohen shërbimet konsullore, Cakaj: Shifër rekord

TIRANË, 21 gusht /ATSH – I. Vata/ – Drejtoria e Çështjeve Konsullore në Ministrinë për Europën dhe Punët e Jashtme dhe Përfaqësitë e Republikës së Shqipërisë në botë, kanë vijuar punën me kapacitet të plotë përgjatë sezonit veror duke qenë në shërbim të qytetarëve.

Ministri në Detyrë Cakaj sjell në vëmendje se përgjatë periudhës 1 janar – 21 gusht 2018 në Ministrinë për Europën dhe Punët e Jashtme janë kryer 246.186 shërbime konsullore.

“Kjo shifër është dyfishuar për të njëjtin hark kohor, por të vitit aktual duke ofruar 442.054 shërbime konsullore nga Drejtoria e Çështjeve Konsullore”, tha ai.

Po ashtu, Cakaj shton se shërbimi konsullor i Përfaqësive, gjatë periudhës 1 janar – 21 gusht 2018 ka kryer 51 635 shërbime dhe 89 691 janë kryer këtë vit.

“Për shkak të vëmendjes së shtuar në përmirësimin e cilësisë të shërbimeve ndaj qytetarëve, puna e MEPJ përgjatë vitit 2019 ka shënuar një shifër rekord në ofrim të shërbimeve konsullore. Kjo shifër përfshin: dhënie vizash, vërtetime në rast humbje dokumentesh, vërtetime identiteti, prokura të posaçme e deklarata noteriale, certifikata familjare e lindje, regjistrime fëmijësh, karta ID dhe pasaporta, mes të tjerash!” shprehet Cakaj në postimin e tij.

Ministri në Detyrë shprehet se MEPJ ka ende shumë punë për të bërë për t’iu shërbyer denjësisht qytetarëve shqiptarë nëpër botë!

“Puna aktuale pasqyron vetëm mundësitë reale të Ministrisë por assesi vullnetin për të shërbyer më shumë e zhvilluar një performancë edhe më cilësore”, mbyll postimin e tij Cakaj.

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.