TIRANË, 30 korrik /ATSH – I. Vata/ – Kryetari i Partisë Demokratike, Lulzim Basha e ka konsideruar dërgimin e policisë te biznesi si një veprim kriminal, ndërsa premtoi se PD do të ulë taksat për biznesin.
Basha tha se dërgimi i policisë në dyert e biznesit është kriminal, njësoj si çdo politikë fiskale dhe ekonomike që ka ndërmarrë kjo qeveri.
Gjatë një takimi në Pogradec, duke folur për krizën e mbledhjes së të ardhurave, Basha tha se taksat e rritura dhe favorizimi i paligjshëm i klientëve të qeverisë, janë dy nga faktorët kryesorë që kanë penalizuar biznesin.
“Ndërsa bizneset e vogla dhe të ndershme goditen me policë dhe me taksa të larta, miqtë e qeverisë gëzojnë ligje speciale për ulje taksash”, – u shpreh Basha.
Po ashtu, Basha u kërkoi demokratëve në të gjithë Shqipërinë të informojnë qytetarët për 3 shtyllat kryesore të platformës pro biznes të Partisë Demokratike.
“Biznesi do të ketë një pullë fiskale që tregon që janë kryer detyrimet ndaj shtetit dhe e asnjë zyrtar shteti nuk do të abuzojë me kontrollet ilegale. Asnjë polic nuk do guxojë të dhunojë biznese dhe sipërmarrje. Ne do të ndërmarrim nismën e uljes së taksave për bizneset dhe për të përmirësuar klimën e biznesit në vend. Taksa 9% mbi të ardhurat dhe tatim fitimin, si dhe shmangia e patrullave gjobëvënëse, taksë 0 për biznesin e vogël. Një paketë e plotë incentivash fiskale në shërbim të biznesit dhe investitorëve”, premtoi Basha. /r.e/
