TIRANË, 25 korrik/ATSH-Maela Marini/ Aktori i njohur i skenës shqiptare, Artan Imami e konsideroi qesharake kontratën e firmosur sot që angazhon opozitën të mbështesë veprimet e Aleancës për të mbrojtur Teatrin Kombëtar.
I ftuar në një studio televizive, ai u shpreh se “ne kemi përballë një kryetar partie që mashtron, gënjen dhe thotë që do të preket trualli i Teatrit Kombëtar, kur trualli nuk preket dhe do të ndërtohet vetëm Teatri”.
“Ky është një njeri që përfaqëson opozitën, që e ka vrarë opozitën. Pastaj aty ka nga ata që kanë ndonjë hall personal me Edi Ramën, kanë preferencat e tyre”, – tha Imami, duke folur për protestën e një grupi artistësh të mbështetur nga opozita kundër shembjes së Teatrit Kombëtar.
Imami tha se “Teatri i ri duhet të ndërtohet”.
Ai u bëri thirrje artistëve që të bashkohen për ngritjen e Teatrit të ri, ndërsa ftoi çdo grupim të ndershëm dhe të papolitizuar që nuk përfshihet në këto prapaskena politike të mbështesë këtë projekt./m.m/
