TIRANË, 14 qershor/ATSH/- Në Fier ka nisur puna për rikonstruksionin e rrugës Varibop-Vjosë, një tjetër kantier ku janë fokusuar investimet vendore.
Kryetari i bashkisë së Fierit, Armando Subashi, bëri të ditur sot se “ka nisur puna për asfaltimin e kësaj rruge, për të siguruar urbanizim sa më të shpejtë të zonës”.
“Asfaltimi i kësaj rruge do të zgjidhë një nga problemet e kahershme të banorëve të dy fshatrave. Tashmë do të ketë akses më të lehtë për fermerët, për fëmijët dhe për të gjithë banorët”, – shprehet Subashi.
Bashkia e Fierit investoi edhe në rrjetin e ujësjellësit për të siguruar furnizim më të mirë me ujë të pijshëm për banorët e kësaj zone. Fillimisht punimet kanë nisur me shtrimin e rrjetit të ri të ujësjellësit dhe ndërhyrjet e tjera të nevojshme.
Shumë shpejt banorët e kësaj zone do të kenë një rrugë me të gjitha standardet e kërkuara. Investimet në rrugët rurale mbeten një prioritet i bashkisë së Fierit, e cila ka shtrirë investimet e saj në të gjitha njësitë administrative. /k.s/ /a.g/
