TIRANË, 30 mars /ATSH/- Konferenca Ndërkombëtare “Roli i Shkrimtarit dhe françeskanit arbëresh Frangjisk Andon Santori për rilindjen kulturore kombëtare”, ka mbledhur në mjediset e Universitetit “Luigj Gurakuqi” në Shkodër studiues, pedagogë, miq e të ftuar edhe nga arbëreshët e Italisë.
Ky aktivitet u organizua në kuadër të 200-vjetorit të lindjes së shkrimtarit arbëresh Frangjisk Andon Santori nga Universiteti i Shkodrës “Luigj Gurakuqi” në bashkëpunim me Fondacionin Universitar “Francesco Solano” në Itali.
At Frangjisk Anton Santori ishte poet e dramaturg arbëresh. Ai ishte nga Shën Katerina e Kozencës. Studioi teologji dhe pjesën më të madhe të jetës e kaloi në manastir, prej nga u largua vitet e fundit. Që herët nisi të mbledhë këngë popullore arbëreshe e të krijojë edhe vetë në gjini e lloje të ndryshme.
Është autor edhe i disa krijimeve satirike. Ai ishte i apasionuar edhe pas folklorit. Ai krijoi 20 këngë arbëreshe, la të pabotuara një përmbledhje këngësh popullore dhe përktheu 100 fabula të Ezopit.
