TIRANË, 22 mars/ATSH/ – Inspektorati Farmaceutik i Ministrisë së Shëndetësisë, pas inspektimeve të kryera mbrëmjen e kaluar në tre subjekte farmaceutike private, ka sekuestruar qindra kilogramë barna ilegale.
Pas marrjes së informacionin nga Njësia Hetuese të Krimeve Ekonomike dhe Policisë së Kosovës, se në një subjekt (garazh) privat dyshohet se ka barna ilegale, IF ka organizuar tre ekipe inspektorësh dhe me asistencë të Policisë së Kosovës ka kryer inspektimet në vendet e dyshuara për mbajtje të barnave ilegale.
Gjatë inspektimit, inspektorët kanë gjetur qindra kilogramë barna ilegale të grupeve të ndryshme farmaceutike.
Po ashtu, janë gjetur barna pa etiketë, por me hyrje të rregullta (leje për autorizim), si dhe barna me etiketë të Serbisë, etj.
Të gjitha këto barna janë evidentuar dhe konfiskuar nga Inspektorati Farmaceutik dhe me to do të procedohet sipas legjislacionit në fuqi.
Inspektorati Farmaceutik mbetet i përkushtuar në përmbushjen e përgjegjësive të tij, me qëllim që në tregun farmaceutik të Kosovës të qarkullojnë produkte të sigurta për përdorim të tyre.
KosovaPress/e.caushi/
