PRISHTINË, 26 dhjetor /ATSH/ – Kryeministri i vendit Ramush Haradinaj, u ka kërkuar autoriteteve përgjegjëse si dhe kompanive që importojnë dhe shesin naftë në Kosovë, që të ulet çmimi i naftës, konform çmimit të tregut.
Përmes një postimi në “Facebook” Haradinaj shprehet se çmimi i naftës në tregun botëror dhe rajonal është më i ulët aktualisht, derisa në tregun kosovar, operatorët nuk kanë reflektuar.
“U bëj thirrje Autoritetit Kosovar të Konkurrencës, Ministrisë së Tregtisë, Shoqatës e Naftëtarëve dhe të gjithë mekanizmat e tjerë që të ndërmarrin hapat e nevojshëm për ta ndryshuar këtë praktikë të keqe që dëmton qytetarët tanë. Çmimi i naftës duhet të jetë konform çmimit të tregut! Është e kuptueshme që tregu i lirë funksionon i pavarur, por kjo nuk nënkupton, në asnjë formë, dëmtimin e qëllimshëm të buxhetit të familjeve kosovare”, tha Haradinaj.
Kreu i Qeverisë shtoi se dëmtimi i padrejtë financiar i qytetarëve të Republikës së Kosovës është i patolerueshëm.
“Kjo po ndodh nga kompanitë që importojnë dhe shesin naftë në Kosovë”, tha Kryeministri. /KosovaPress//a.g/
