TIRANË, 24 prill /ATSH- I. Vata/ – “Ëndrrën amerikane shqiptarët e kanë bërë realitet”. Përtej oqeanit jetojnë mijëra bashkëatdhetarë të cilët janë afirmuar në fusha nga më të ndryshmet, duke konkurruar denjësisht në tregun amerikan, deklaroi ministri për Diasporën, Pandeli Majko, në takimin me sipërmarrës shqiptarë në Çikago të SHBA-së.
Ministri i Shtetit për Diasporën, Pandeli Majko zhvilloi një takim me sipërmarrës shqiptarë të diasporës në Çikago.
Një histori suksesi është ajo e Xheneto Harushës, kryetar i Komunitetit Shqiptar të Illinois dhe drejtues i kompanisë “Amazing Trucking&Logistics” e specializuar në transport rrugor, ajror dhe logjistikë.
Në takimin e zhvilluar me ministrin Majko, sipërmarrësi tha se kishte rreth 200 të punësuar nga 3 kontinente, përfshirë edhe shqiptarë.
“Punojmë me dy prej hekurudhave më të mëdha të SHBA-së dhe 3 shtëpitë më të mëdha prodhuese të automjeteve. Jemi të specializuar për JIT – Just in Time Logistic, që do të thotë, të arrish të kontrollosh inventarin e një fabrike brenda 15 minutave”, tha Harusha, i cili shtoi se vetëm 30 kompani në SHBA, Kanada dhe Meksikë e ofrojnë këtë shërbim.
Sipërmarrësi informoi Ministrin lidhur me synimin e tij për të depërtuar në tregun shqiptar, duke mundësuar vende të reja pune.
Ardita Dalipi u largua nga Kosova drejt Çikagos, për t’i shpëtuar luftës së viteve ’90 dhe tani drejton një klinikë të suksesshme dentare që numëron klientë të shumtë.
Gjatë takimit më ministrin Majko, Dalipi foli për vështirësitë dhe sakrificat, të cilat siç tha, ishin shpërblyer në vitin 2011, me hapjen e klinikës.
Një tjetër sipërmarrje e suksesshme shqiptare në Çikago është ajo e familjes Ramadani nga Maqedonia, “Cross Country Mortgage”, shoqëri rifinancimi e kredive hipotekare.
Ekipi i ekspertëve shqiptarë, përmes një procesi të kujdesshëm vlerësimi dhe konsulence, ndihmon klientët të sigurojnë kredi bankare për shtëpi. Vetëm vitin e kaluar, firma ka ndihmuar mbi 2000 familje.
Ministri u takua gjithashtu edhe me Nicholas Vangel, shqiptar i lindur në Shtetet e Bashkuara të Amerikës, por që ruan vlerat dhe kulturën e vendit të origjinës. Vangel drejton një kompani të suksesshme ndërtimi, ku janë të punësuar një grup shqiptarësh.
