SHBA, 4 nëntor/ATSH/ Demokrati James Talarico ka fituar garën për Senatin amerikan në shtetin e Teksasit, duke shënuar fitoren e parë të një kandidati demokrat në këtë garë që prej vitit 1988, raportoi BBC.
Fitorja e Talaricos ndaj kandidatit republikan Ken Paxton konsiderohet një nga surprizat më të mëdha të zgjedhjeve të këtij viti në SHBA dhe një goditje e rëndësishme për republikanët.
Ish-mësuesi dhe ligjvënësi i shtetit të Teksasit ishte një figurë relativisht pak e njohur deri vitin e kaluar. Gjatë fushatës së tij, ai vendosi në qendër të debatit rritjen e kostos së jetesës nën drejtimin republikan, duke fituar mbështetjen e një pjese të konsiderueshme të elektoratit.
Paxton, nga ana e tij, u përpoq ta paraqiste kundërshtarin si tepër progresist për Teksasin dhe zhvilloi disa aktivitete elektorale së bashku me presidentin Donald Trump.
Gara u shndërrua në një nga më të kushtueshmet në historinë e zgjedhjeve për Senatin amerikan, me shpenzime që kaluan gjysmë miliardi dollarë. Miliarderi Elon Musk kontribuoi me 158 milionë dollarë në një komitet politik që mbështeste fushatën e Paxton.
Fitorja e Talaricos vjen në një klimë të rezultateve të favorshme për demokratët në disa shtete, duke sinjalizuar një ndryshim të rëndësishëm të klimës politike në SHBA.
Teksasi, shteti i dytë më i populluar në vend, ka qenë prej dekadash një bastion i republikanëve. Rezultati i fundit shënon një zhvillim historik për demokratët në këtë shtet.