UASHINGTON, 11 shkurt /ATSH-DPA/ – Presidenti amerikan, Donald Trump po dërgon sekretarin e tij të Thesarit, Scott Bessent në Ukrainë për bisedime mbi përfundimin e luftës me Rusinë.
”Bessent do të takohet me presidentin ukrainas, Volodymyr Zelensky”, shkroi sot Trump në platformën e tij në internet Truth Social duke shtuar se lufta duhet të përfundojë dhe do të ndodhë së shpejti.
“Kur Amerika është e fortë, bota është në paqe”, shtoi ai me shkronja kapitale.
Trump nuk specifikoi një orë apo datë për udhëtimin e Bessent-it.
Së fundmi, Trump e ka lidhur ndihmën e mëtejshme të SHBA-së për Ukrainën me aksesin e SHBA-së në lëndët e para të saj.
Zelensky nga ana e tij e ka bërë të qartë se ai dëshiron të tregojë mirënjohjen e tij për ndihmën perëndimore në formën e burimeve të rralla minerale.
Ukraina është mbrojtur kundër një pushtimi rus për gati tre vjet.
Të premten, Trump parashtroi mundësinë e një takimi me Zelensky në Uashington këtë javë dhe theksoi se ai nuk dëshironte të udhëtonte vetë në Ukrainë./ a.jor.