TIRANË, 4 shkurt /ATSH/ Daut Laze, 49-vjeç është arratisur nga burgu i Shënkollit në Lezhë.
Drejtoria e Burgjeve njofton se “më datë 4 shkurt 2025, në orët e para të mëngjesit, gjatë ndërrimit të turneve dhe kryerjes së apelit në IEVP Lezhë, është konstatuar mungesa e pacientit Daut Hysen Laze, i lindur më 30 gusht 1976 në Çorovodë dhe banues në Tiranë”.
“Ai ishte arrestuar më 16 nëntor 2021. Me vendimin nr. 528, akti datë 4 nëntor 2024, Gjykata e Shkallës së Parë të Juridiksionit të Përgjithshëm Tiranë kishte vendosur ndaj tij masën mjekësore “Mjekim i detyruar në një institucion mjekësor”, njofton më tej Drejtoria e Burgjeve.
Sipas Drejtorisë së Burgjeve “pas kontrollit të menjëhershëm nga stafi i policisë në institucion, është vërejtur se ky shtetas me mjekim të detyruar ka shfrytëzuar hapësirat e mundshme të cilat janë në parametrat e institucionit të posaçëm mjekësor për tu larguar nga rrethimi i institucionit”.
“Aktualisht, po analizohen pamjet e kamerave për të zbardhur dinamikën e plotë të ngjarjes.
“Për ngjarjen është njoftuar Shërbimi i Kontrollit të Brendshëm të Burgjeve (SHKBB) dhe po punohet intensivisht në bashkëpunim me strukturat e policisë për kapjen e tij”, njofton Drejtoria e Burgjeve.
Policia e Shtetit deklaron se ka vendosur shpërblimin prej 10 000 euro për çdo informacion që çon në gjetjen e shtetasit Daut Hysen Laze, i cili paraqet rrezikshmëri shoqërore. Çdo qytetar mund të kontaktojë në numrin pa pagesë 112 të Policisë së Shtetit ose në numrin 068 200 29 61, të vendosur nga Drejtoria e Përgjithshme e Burgjeve.
Policia sqaron se shtetasi Daut Laze është arrestuar në vitin 2021, për veprën penale “Dhuna në familje”, dhe në vitin 2024, Gjykata e Tiranës i ka caktuar masën “Mjekimi i detyruar në një institucion mjekësor”, sqaron policia.
49-vjeçari paraqet rrezikshmëri shoqërore, prandaj kërkojmë ndihmën e qytetarëve, për të njoftuar menjëherë Policinë e Shtetit, për çdo të dhënë në lidhje me vendndodhjen e tij. /a.g/