TIRANË, 29 dhjetor /ATSH/ Dy 18-vjeçarë kanë rënë në prangat e policisë në Durrës, pasi tre muaj më parë kanë djegur qëllimisht dy automjete në qytetin bregdetar.
Policia e Durrësit ka mundur të identifikojë dhe të vërë në pranga 2 autorët,ka shpallur në kërkim bashkëpuntorin e tyre si dhe ka proceduar penalisht një i mitur.
Policia e Shtetit njofton sot se specialistët për Hetimin e Krimeve në Stacionin e Policisë Plazh, pas informacioneve të marra se në lagjen nr. 13, është djegur një automjet dhe një tjetër pjesërisht, kanë organizuar punën për zbardhjen e kësaj ngjarjeje.
Mbas një pune hetimore dhe profesionale, bazuar dhe në informacionet e siguruara në rrugë operative u bë e mundur zbardhja e ngjarjes, djegia e qëllimshme e dy automjeteve.
Në vijim të veprimeve u bë identifikimi, kapja dhe arrestimi shtetasve E. H., 18 vjeç dhe A. G., 18 vjeç, të dy banues në Durrës.
U shpall në kërkim shtetasi E. R., 32 vjeç, si dhe nisi procedimi penal në gjëndje të lirë për shtetasin A. Gj.
Këta shtetas në bashkëpunim me njëri -tjetrin, më datë 23.09.2024, kanë djegur qëllimisht dy automjete.
Vijon puna për kapjen e shtetasit të shpallur në kërkim.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.