KIEV, 27 dhjetor /ATSH-DPA/- Presidenti ukrainas Volodymyr Zelensky i ka bërë thirrje Kinës të ushtrojë ndikim në Korenë e Veriut – në përgjigje të dislokimit së ushtarëve të Koresë së Veriut përkrah trupave ruse në luftën në Ukrainë.
“Vendi korean nuk duhet të humbasë popullin e tij në betejat në Evropë”, tha Zelensky në fjalimin e tij të mbrëmjes.
“Nëse Kina është e sinqertë në deklaratat e saj se lufta nuk duhet të përshkallëzohet, ajo duhet të ushtrojë presionin e duhur mbi Phenianin”, shtoi ai.
Kina është aleati më i ngushtë i vendit të izoluar komunist.
“Moska po përdor kryesisht trupat e Koresë së Veriut në përpjekjet e saj për të rimarrë zonën ruse të Kurskut, e cila është pjesërisht e pushtuar nga trupat ukrainase”, tha Zelensky.
“Ne po shohim se ushtria ruse dhe forcat e Koresë së Veriut nuk kanë aspak interes për mbijetesën e këtyre koreanëve”, shtoi Zelensky.
“Gjithçka po bëhet për të shmangur kapjen e ushtarëve të Koresë së Veriut nga ushtria ukrainase”, tha ai, duke pretenduar se trupat e Koresë së Veriut preferojnë të vrisnin njëri-tjetrin sesa të kapeshin rob.
Ky pretendim nuk mund të verifikohet në mënyrë të pavarur.
Koreja e Veriut thuhet se ka dërguar rreth 10 000 trupa në Rusi për të mbështetur Moskën në luftën e saj kundër Kievit.
Më herët, agjencia e lajmeve e Koresë së Jugut “Yonhap” raportoi se një ushtar i kapur nga Koreja e Veriut kishte vdekur nga plagët e marra gjatë luftimeve në Rusi.
Në fjalimin e tij të mbrëmjes, Zelensky tha se disa trupa të Koresë së Veriut ishin kapur dhe kishin vdekur nga plagët. //a.i/