TIRANË, 24 dhjetor/ATSH/ Prefektura e Qarkut Kukës bëri me dije sot se të gjitha akset rrugore nacionale janë të qarkullueshme megjithëse se moti është me erë dhe në lartësinë mbi 1000 m ka reshje të dobëta dëbore.
Subjektet kontraktore kanë punuar gjatë gjithë kohës me të gjitha kapacitetet për pastrimin nga bora, kriposjen dhe mbajtjen funksionale të këtyre akseve.
Rruga Kukës – Shishtavec është e kalueshme me pajisje antirrëshqitëse dhe goma dimërore.
Në akset rrugore të Tropojës, Bajram Curri – Morinë, Bajram Curri – Valbonë, Bajram Curri-Fierzë-Lekbibaj, ka dëborë të ngrirë, po hidhet kripë dhe nuk ka probleme për qarkullimin me përdorimin e pajisjeve antirrëshqitëse.
Të gjitha rrugët e tjera nacionale të Qarkut Kukës nuk paraqesin asnjë problematikë.
Ndërkohë, shërbimet e Policisë Rrugore kanë vazhduar patrullimet në lëvizje gjatë gjithë kohës. Nga bashkitë Kukës, Tropojë dhe Has nuk ka raportime për ndonjë problematikë emergjente. Nga strukturat e Emergjencave Civile të bashkive ka vazhduar puna për hapjen e rrugëve që lidhin fshatrat me njësitë administrative e rrugët nacionale.
I gjithë Qarku i Kukësit furnizohet me energji elektrike, përveç disa njësive administrative për të cilat bëhet e ditur se OSHEE po punon për eliminimin e këtyre defekteve. Ndërsa furnizimi me ujë të pijshëm është normal.
/r.e/