PARIS, 21 dhjetor /ATSH-AFP/ – Kancelari gjerman, Olaf Scholz po udhëton sot për në Magdeburg, një qytet i tronditur nga një sulm me makinë në tregun e Krishtlindjeve, motivet e të cilit mbeten të paqarta pavarësisht arrestimit të autorit të dyshuar me origjinë saudite.
Gjurmë islamike?
Çrregullime psikologjike të psikiatrit 50-vjeçar i arrestuar në vendngjarje?
Një tjetër motivim?
“Në gjendjen aktuale të hetimit nuk është ende e mundur të kategorizohet ajo që ndodhi në tregun e Krishtlindjeve”, tha policia lokale.
Olaf Scholz shkon atje, së bashku me ministrin e tij të Brendshëm, për t’u përpjekur për të mësuar më shumë dhe për të ofruar mbështetje për popullsinë vendase, të traumatizuar nga ky sulm që ndodhi në mes të fushatës elektorale.
“Ajo që ndodhi sot prek shumë njerëz, na prek shumë edhe ne”, tha Fael Kelion, një 27-vjeçar nga Kameruni që jeton në qytet.
Rreth orës 19:00 (18:00 GMT), një makinë u vërsul papritur në korridoret e tregut lokal të Krishtlindjeve, duke ”kositur” të pranishmit atje një nga një, në rrugën e saj mbi 400 metra.
Ende vlerësimi i përkohshëm i kësaj masakre është dy të vdekur, duke përfshirë një fëmijë, dhe më shumë se 60 të plagosur, rreth 15 në gjendje të rëndë.
“Të gjithë ishin të shtrirë në tokë, fëmijë, burra, njerëz të lënduar me fraktura të hapura, është e paimagjinueshme”, tha një dëshmitar për kanalin televiziv ”Welt TV”.
“Është e tmerrshme, gjatë gjithë kësaj kohe ishte një trup i pajetë pranë meje… Bota është e sëmurë”, shton miku i tij.
Sulmi ndodhi pothuajse tetë vjet pas një akti të ngjashëm, të kryer në një treg Krishtlindjesh në Berlin, ndërsa Gjermania, në mes të një fushate elektorale, është në gatishmëri ndaj rrezikut të sulmeve.
– Tetë vjet pas Berlinit –
Për autoritetet, data nuk është rastësi dhe është zgjedhur qëllimisht.
Por, askush nuk nxori menjëherë përfundimin se ishte, si në Berlin në vitin 2016, një sulm islamik.
Sepse profili i autorit të dyshuar, i paraqitur në mediat gjermane si Taleb A., i arrestuar në makinën e dashit, është intrigues.
Duke jetuar në Gjermani që nga viti 2006, mjek që praktikonte zanatin në qytetin e Bernburgut, afër Magdeburgut dhe me status refugjati, ai nuk shquhej aspak për simpatitë e tij ndaj lëvizjes xhihadiste.
Përkundrazi, postimet e tij të shpeshta në rrjetet sociale japin portretin e një njeriu që ndihet i persekutuar, i shkëputur nga Islami dhe përkundrazi denoncon rreziqet e një islamizimi të Gjermanisë.
Disa media madje i atribuojnë lidhjet me të djathtën ekstreme gjermane.
Në çdo rast, ai ishte i njohur në komunitetin e emigrantëve sauditë në Gjermani dhe ndihmonte azilkërkuesit, veçanërisht gratë.
“Motivimet mbeten misterioze, një sfond islamik duket i përjashtuar”, gjykon e përjavshmja ”Der Spiegel”.
– Rimëkëmbja politike –
E djathta ekstreme gjermane megjithatë e ka marrë këtë çështje në prag të zgjedhjeve të parakohshme legjislative gjermane më 23 shkurt, ku çështja e emigracionit do të luajë një rol të rëndësishëm, pas disa sulmeve të kryera muajt e fundit nga të panjohur.
“Kur do të përfundojë kjo çmenduri?”, shkroi në X bashkëpresidentja e AfD, Alice Weidel, partia e së cilës është e dyta në sondazhe, me pothuajse 20%.
Partia e vendos veten pas konservatorëve, të cilët gjithashtu bëjnë thirrje për shtrëngim të masave në pritjen e refugjatëve.
Për Fael Kelion ka pak dyshime.
“Mendoj se meqenëse (i dyshuari) është i huaj, popullata do të jetë e pakënaqur, më pak mikpritëse”, thotë ai.
Disa kryeqytete shprehën tronditjen e tyre, si Roma, Madridi dhe Uashingtoni, me Shtetet e Bashkuara që thanë se ishin të gatshme të “siguronin ndihmë”.
Presidenti francez Emmanuel Macron dhe kryeministri i tij i ri François Bayrou shprehën “solidaritetin” e Francës.
Arabia Saudite, vendi i origjinës së të dyshuarit, e dënoi sulmin dhe pohoi “refuzimin e dhunës”./ a.jor.