PRISHTINË, 8 dhjetor/ATSH/- Presidentja e Kosovës, Vjosa Osmani ka publikuar në rrjetet sociale një fotografi me presidentin e Shteteve të Bashkuara të Amerikës, Donald Trump dhe presidentin e Francës, Emanuel Macron.
“Aleanca euroatlantike”, shkruan Osmani krahas fotos.
Gjithashtu, Osmani ka dhënë detaje nga biseda me presidentin e sapo zgjedhur të SHBA-së Donald Trump, gjatë rihapjes së katedrales Notre Dame në Paris.
Osmani ka shkruar në rrjetin X, se në emër të popullit të Kosovës, e ka përgëzuar Trump për fitoren në zgjedhjet presidenciale të 5 nëntorit.
“Rikonfirmova gjithashtu angazhimin tonë për të forcuar aleancën tonë. Ne mbështetemi në udhëheqjen e fortë të SHBA-së ndërsa punojmë së bashku për të promovuar paqen, sigurinë dhe prosperitetin në rajonin tonë dhe më gjerë”, ka shkruar ajo.
/KosovaPress/
