TIRANË, 2 dhjetor /ATSH/ Për të shënuar Ditën Ndërkombëtare të Personave me Aftësi të Kufizuara, e cila është nesër, Delegacioni i Bashkimit Evropian në Tiranë kremtoi sot kontributet e individëve me aftësi të kufizuara, duke riafirmuar angazhimin e BE-së për ndërtimin e një shoqërie më gjithëpërfshirëse.
“Nëpërmjet nismave tona si BE për Përfshirjen Sociale, ne fokusohemi në krijimin e mundësive, përmirësimin e aksesit dhe sigurimin që askush të mos mbetet pas”, thekson Delegacioni i BE në një reagim.
Shefi i Seksionit Politik në Delegacionin e BE-së në Shqipëri, André Rizzo u shpreh se, “çdo ditë, ne jemi dëshmitarë të pengesave për jetën e pavarur për personat me aftësi të kufizuara, qoftë aksesi fizik në mjetet e transportit publik dhe ndërtesat, apo aksesi të kufizuar në informacion dhe shërbime që i pengojnë ata të gëzojnë të drejtat e tyre themelore”.
“Në kuadër e negociatave të anëtarësimit të Shqipërisë në BE, është thelbësore të jepet prioritet përafrimi me standardet e BE-së për përfshirjen sociale dhe mbrojtjen sociale për personat me aftësi të kufizuara. BE-ja është e përkushtuar të mbështesë Shqipërinë në këtë përpjekje”, tha ai.
/r.e/