TIRANË, 16 nëntor /ATSH/ Mbi 94% e ndërmarrjeve e kanë mbyllur 6- mujorin e parë të këtij viti me fitim.
Banka e Shqipërisë publikoi të dhënat e vrojtimit të ndërmarrjeve për gjashtëmujorin e parë 2024, që u realizua nëpërmjet një kampioni prej 1,355 ndërmarrjesh të madhësive të ndryshme, të shtrira gjeografikisht në të gjithë vendin dhe që kryejnë aktivitetin e tyre në sektorët kryesorë të ekonomisë.
Sipas vrojtimit, Mbi 94% e ndërmarrjeve kanë raportuar fitim gjatë periudhës. Pritshmëritë për gjashtëmujorin e ardhshëm për nivelin e shitjeve të përgjithshme dhe rezultatin financiar rezultojnë pozitive, dhe më optimiste krahasuar me gjashtëmujorin e kaluar, por duke mbetur në vlerat e një viti më parë.
Sinjalet vijojnë të jenë optimiste lidhur me zgjerimin e veprimtaris ë apo rritjen e investimeve,veçanërisht tek ndërmarrjete vogla dhe të mesme, por paraqesin ngushtim për grupin e ndërmarrjeve të mëdha.
Gjatë periudhës, rreth 57% e ndërmarrjeve kanë vijuar të financojnë veprimtarinë e tyre vetëm nëpërmjet shitjeve (rreth 66% e ndërmarrjeve të vogla, 57% e ndërmarrjeve të mesme dhe 54% e ndërmarrjeve të mëdha), duke shënuar rënie për të tre kategoritë e ndërmarrjeve.
Ndërkohë, prirja e kombinimit të burimeve të financimit vijon të zërë një peshë të konsiderueshme për periudhën, duke u rritur krahasuar me periudhën e kaluar, për të tre grupet e ndërmarrjeve. /j.p/