TIRANË, 10 korrik /ATSH/ Sekretari i Përgjithshëm i Partisë Demokratike, Gazment Bardhi reagoi sot pas kërkesës së SPAK drejtuar Kuvendit për arrestimin e deputetit Arben Ahmetaj.
Bardhi u shpreh se, “kërkesa për të çuar Arben Ahmetaj para drejtësisë për aferën korruptive të inceneratorëve është një veprim i drejtë, por i vonuar dhe i paplotë”.
“SPAK duhet t’i shkojë deri në fund, duke bërë një hetim të plotë dhe të gjithanshëm deri tek kreu i aferës korruptive, Edi Rama”, theksoi Bardhi.
“Së bashku, ata kanë kryer disa nga veprat më monstruoze të korrupsionit qeveritar në 3 dekadat e fundit”, shtoi ai.
“I kërkoj kryetares së Kuvendit të mbledhë pa vonesë sot Këshillin e Mandatave. SPAK-ut i duhet dhënë menjëherë akses për kontrollin personal dhe të banesës së ish-zv/KM”, shkroi Bardhi në një postim në rrjetet sociale.
Edhe deputetja e Partisë së Lirisë, Monika Kryemadhi reagoi pas kërkesës së SPAK drejtuar Kuvendit për arrestimin e deputetit Arben Ahmetaj.
“Lajm i fundit: SPAK kërkon arrestimin e Arben Ahmetaj, ish-Zv/Kryeministër. Të arrestuarit venë e vijnë, ndërsa PAGESAT vetëm venë. Follow the money… SPAK mos harro të ndalosh edhe pagesat e Bashkisë Tiranë!”, shkroi Kryemadhi në një postim në rrjetet sociale.
/r.e/