TIRANË, 11 tetor /ATSH/ Kryetari i Partisë së Lirisë, Ilir Meta u shpreh sot se në zgjedhjet lokale PL do t’i kërkojë shqiptarëve të ndëshkojnë kandidatët e “Rilindjes”.
“Do t’i kërkojmë shqiptarëve të ndëshkojnë kandidatët e ‘Rilindjes’ për këtë shpërdorim total që i kanë bërë pushtetit vendor që e kanë pasur 100 % të tyre me kryetar dhe në këshilla. Ky është mesazhi ynë, sepse ndëshkimi është shumë i rëndësishëm edhe për atë që do të vijë nesër, të opozitës. Mesazhi i Partisë së Lirisë është shumë i qartë ndëshkim për këtë katastrofë menaxhimi të rilindjes”, tha ai.
“Ndëshkim për të gjithë këtë katastrofë menaxhimi të pushtetit vendor gjatë këtyre 4 viteve nga rilindja. Çdo forcë politike do punojë si forcë politike për këshillat për të tjerat mesazhi është i qartë”, u shpreh Meta.
Për aleancën me PD në zgjedhjet e ardhshme, Meta tha se, “Aleanca e Ilir Metës është me qytetarët e Shqipërisë. Për sa i takon problemeve të brendshme të Partisë Demokratike jam përpjekur që t’i zgjidh ato prej shumë kohësh në interes të vendit”.
Meta u shpreh se, ka qenë ai që e ka nxjerrë nga çadra PD-në.
“Nuk dua të hyj më tej në çështjet e brendshme të PD. Ne kemi raportin tonë me qytetarët e Shqipërisë, e kemi me demokracinë, me luftën kundër korrupsionit dhe oligarkëve”, tha Meta.
I pyetur për emrat e kandidatëve të mundshëm, Meta tha se, “nuk mund të hyj unë në çështje emrash se nuk është përgjegjësia ime emri. Unë vlerësimet e mia mund t’i kem për cilindo, por nuk hyj dhe nuk ndikoj në këto çështje kur përgjegjësinë e ka marr një lider tjetër. Kjo çështje ka përfunduar për Tiranën dhe gjithë Shqipërinë”.
“Objektivi ynë në këto zgjedhje janë këshillat dhe do t’i kthejmë në parlamente lokale”, theksoi Meta.
/j.p/r.e/