TIRANË, 24 qershor/ATSH/ Në kuadër të Ditës Ndërkombëtare të Komunitetit Egjiptian, bashkia e Lezhës organizoi sot një aktivitet për promovimin e trashëgimisë së kulturës, arsimimit dhe traditës egjiptiane.
Në fokus të këtij takimi ishte mirënjohja për anëtarët e këtij komuniteti që kanë kontribuar ndër vite në zhvillimin dhe integrimin e kulturës dhe traditës egjiptiane.
Në mënyrë të veçantë mirënjohja ishte për të ndjerët, Rauf Selimi dhe Luciano Levri, të cilët ndër vite promovuan rëndësinë e arsimimit tek fëmijët dhe mbështetjen konkrete për zhvillimin e tyre.
Bashkia Lezhë shpërndau certifikata mirënjohjeje për tre të rinj të arsimuar të këtij komuniteti, të cilët duhet të shërbejnë si udhërrëfyes për brezat e ardhshëm.
Nga ana e tij, kryetari i bashkisë Lezhë, Pjerin Ndreu falënderoi qendrat sociale, “Shejntja Mari”, “Malteser”, Terre des Hommes, “Jozue”, organizatën Caritas dhe Drejtësi Sociale që punojnë për arsimimin e këtij komuniteti.
/m.m/j.p/r.e/