PARIS, 4 janar /ATSH-AFP/ – Masa të reja dhe raporte të reja.
Më poshtë vijon situata më e fundit e pandemisë së Covid-19 në botë:
– SHBA dritë jeshile për përforcuesin e vaksinimit për moshat 12-15 vjeç –
Autoritetet shëndetësore amerikane autorizuan të hënën injektimin e dozave përforcuese të vaksinës Pfizer për moshat 12-15 vjeç dhe reduktuan nga gjashtë në pesë muaj kohën para injektimit të kësaj doze të tretë, për të gjitha grupmoshat.
Rritja e numrit të rasteve me Covid-19 në vend, me një mesatare prej gati 400 000 kontaminime të reja në ditë, ndjek një kurbë pothuajse vertikale, që aktualisht nuk është rasti me shtrimet në spital.
– Franca në debat parlamentar për vaksinimin –
Përballë baticës së variantit Omicron, deputetët francezë nisën të hënën, në një atmosferë të stuhishme, shqyrtimin e projektligjit që e shndërron letrën shëndetësore në një leje vaksine.
Ky tekst do t’ju kërkojë të tregoni një certifikatë vaksinimi kundër Covid për të aksesuar aktivitetet e kohës së lirë, restorantet dhe baret, panairet ose transportin publik ndërrajonal.
Ministri i Shëndetësisë Olivier Véran paralajmëroi në radio France Inter se janari do të jetë “i vështirë në spital”.
Mesatarisht gjatë shtatë ditëve të fundit, më shumë se 160 000 njerëz janë infektuar në vend, me kulme ditore ndonjëherë përtej 200 000.
– Holandë vendos rihapjen e shkollave më 10 janar –
Shkollat fillore dhe të mesme dhe kujdesi jashtëshkollor do të rihapen më 10 janar në Holandë, njoftoi qeveria të hënën, duke shënuar hapin e parë drejt rihapjes së vendit, i kufizuar për dy javë në përpjekje për të ndaluar shpërthimin e Omicron.
– Kuvajti u bën thirrje qytetarëve të tij të largohen nga vendet evropiane –
Kuvajti u bëri thirrje qytetarëve të tij që të mos udhëtojnë në disa vende evropiane, përfshirë Francën, Gjermaninë dhe Mbretërinë e Bashkuar, dhe të largohen nga ato nëse janë tashmë atje.
– Izraeli vendos për dozën e katërt për mbi 60 vjeçarët –
Izraeli filloi të hënën të injektojë një dozë të katërt të vaksinës së koronavirusit te njerëzit e moshës 60 vjeç e lart, mes një rritjeje të kontaminimit të lidhur me variantin shumë ngjitës Omicron.
– India vaksinon 15-18 vjeçarët –
India filloi vaksinimin e të rinjve të moshës 15 deri në 18 vjeç kundër Covid-19 të hënën, ndërsa autoritetet rritin masat shëndetësore në qytetet e mëdha për të frenuar përhapjen e Omicron.
– Më shumë se 5,4 milionë të vdekur në të gjithë botën –
Pandemia ka vrarë të paktën 5 441 446 njerëz në mbarë botën që nga dhjetori 2019.
Në terma absolutë, SHBA është vendi me më shumë vdekje 826 064, e pasuar nga Brazili (619 133), India (481 893) dhe Rusia (311 353).
Organizata Botërore e Shëndetësisë vlerëson, duke marrë parasysh vdekshmërinë e tepërt të lidhur direkt dhe indirekt me Covid-19, se numri i pandemisë mund të jetë dy deri në tre herë më i lartë se ai i regjistruar zyrtarisht./ a.jor.