Mbështetje universiteteve për më shumë projekte kërkimore-shkencore

TIRANË, 25 nëntor/ATSH/ Ministrja e Arsimit dhe Sportit, Evis Kushi mori pjesë në ceremoninë e 70-vjetorit të Universitetit Politeknik të Tiranës (UPT).

Në fjalën e saj, Kushi u ndal te kontributi i madh që ka patur UPT ndër vite, jo vetëm në arsimin e lartë, në inxhinieri, por edhe në zhvillimin e vendit në drejtim të teknologjisë, inovacionit, industrisë dhe ekonomisë.

Ministrja Kushi u shpreh se një nga prioritetet e vendosura bashkë me rektorët është ndërkombëtarizimi i universiteteve, si dhe rritja e cilësisë dhe vlerave të diplomave të universiteteve shqiptare.

Në këtë pikë, UPT i ka paraprirë këtij objektivi dhe është përfshirë në shumë rrjete akademike ballkanike, mesdhetare dhe europiane.

Kushi përgëzoi pedagogët për nivelin e ri në të cilin është ngritur puna kërkimore-shkencore.

Ministria e Arsimit dhe Sportit projektet individuale apo të përbashkëta i ka mbështetur edhe financiarisht gjatë këtij viti.

“Presim edhe më shumë projekte kërkimore shkencore nga të gjitha universitetet. I stimulojmë të gjitha universitetet që të marrin pjesë në programet e mëdha të BE, si Horizon Europe,” u shpreh Kushi.

Për projektet cilësore ajo premtoi mbështetje, së bashku me Agjencinë Kombëtare të Kërkimit Shkencor dhe Inovacionit (AKKSHI), me më shumë konsulencë dhe asistencë për të hartuar projekte cilësore me ekspertë vendas dhe të huaj.

Duke folur për përshtatjen me nevojat e tregut, Kushi tha se Universiteti Politeknik i Tiranës ka pasur një përshtatje mjaft të mirë, duke ndjekur zhvillimet dhe dinamikat, si dhe ka krijuar marrëdhënie me kompani nga më të mëdhatë në fushat e industrisë brenda dhe jashtë vendit.

Këto kompani shërbejnë më pas si potencial shumë i mirë për rritjen e mundësisë së punësimit të të diplomuarve të këtij universiteti.

/m.m/j.p/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.