Tripletë kuqezi, Vrioni i jep fitoren Tirolit në Austri

TIRANË, 22 nëntor/ATSH/ Sulmuesi shqiptar i “Tirolit”, Giacomo Vrioni po kalon një formë të shkëlqyer me klubin e tij në Austri, teksa që pas rikthimit nga dëmtimi ka gjetur disa herë rrugën e golit.

Në fitoren 5-1 të “Tirolit” ndaj “Wolfsberger”, sulmuesi kuqezi ka shënuar tripletë, ndërsa ka asistuar edhe në një nga dy golat e tjerë të shënuar nga shoku i skuadrës.

Fillimisht, Vrioni hapi serinë e golave për ekipin e tij që në minutën e 26-të, teksa dërgoi me kokë topin në rrjetën kundërshtare, ndërsa më pas dhuroi edhe asistin për Sabitzer, i cili dyfishoi shifrat.

Në fraksionin e dytë të lojës, djaloshi shqiptar shënoi edhe dy golat e tjerë. Në minutën e 62-të, Vrioni realizon edhe golin e dytë personal, teksa arrin të kalojë kundërshtarët në zonë dhe e dërgon topin në rrjetë.

Ndërsa goli i tretë do të ishte me të vërtetë i shkëlqyer për të, me një top të dhuruar nga Muller nga mesi i fushës dhe me Vrionin që e gjuan nga jashtë zone, duke e dërguar në fundin e rrjetës dhe duke vulosur edhe tripletën e parë me “Tirolin”.

Një ndeshje për t’u mbajtur mend kjo nga ana e sulmuesit shqiptar, me tre gola të shënuar dhe një asist të dhuruar. Sipas uebsajtit të specializuar për statistika, Sofascore, Vrioni është vlerësuar si futbollisti me notën më të lartë në ndeshje, 9.5.

Në 10 ndeshje të luajtura me “Tirolin”, Vrioni ka shënuar 8 gola, teksa kujtojmë që futbollisti shqiptar ka pak kohë që është rikthyer me skuadrën për shkak të një dëmtimi. Giacomo Vrioni është huazuar që nga vera e këtij viti nga “Juventusi” te skuadra e “Tirolit” në Austri.

/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.