Osmani: Serbia nuk synon të nënshkruajë marrëveshje finale me Kosovën

PRISHTINË, 26 tetor/ATSH/ Presidentja e Kosovës Vjosa Osmani ka komentuar procesion e dialogut me palën serbe në Bruksel dhe arritjen e mundshme të një marrëveshje gjithëpërfshirëse ligjore.

 Ajo në Prime Time të Kanal 10 ka thënë se Serbia nuk është e interesuar të arrijë marrëveshje me Kosovën.

“Serbia nuk është e interesuar për paqe, as për zgjidhjen e çështjes së të pagjeturve dhe nuk synon të arrijë marrëveshje me Kosovën”, u shpreh Osmani.

Presidentja Vjosa Osmani ka thënë se në gjashtë muajt e fundit Kosova ka përmirësuar imazhin e saj para ndërkombëtarëve, ndonëse ka pranuar se në këtë drejtim ka ende punë për të bërë.

Ajo ka thënë se përmirësimi i imazhit të vendit tonë vjen si rezultat i punës së mirë që është kryer gjatë kësaj periudhe nga institucionet vendore.

Osmani tha se gjatë kësaj periudhe është dashur të sanohen dëmet e bëra në të kaluarën.

“Kemi pasur një prezencë të madhe në mediat ndërkombëtare, ku kemi prezantuar Kosovën si një shtet kredibil dhe këtë e dëshmuar me shumë veprime në gjashtë muajt e fundit. Tash kemi një brez të ri politik, kemi politikanë që përfaqësojnë diçka më ndryshe. Kemi punuar me shumë investues ndërkombëtarë që patën humbur besimin për shkak të gabimeve në të kaluarën. Tash ata e shohin Kosovën si vend ku mund të zhvillojnë aktivitetin e tyre”, u shpreh Osmani.

Sipas saj, ka një ndryshim thelbësor në qeverisjen e vendit që ka ndryshuar imazhin e Kosovës para faktorit ndërkombëtar.

“Për një kohë të shkurtër nuk mund të ndryshojnë të gjitha gjërat, por ka një ndryshim drastik pozitiv”, është shprehur ajo. /KosovaPress/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.