Përfundon legalizimi për 231 njësi banimi në Unazën e Re

TIRANË, 16 tetor /ATSH/ Drejtori i Përgjithshëm i Kadastrës, Artan Lame i shoqëruar nga drejtori i DVASHK Rurale 2, Artur Çobani, kanë marrë pjesë në përfundimin e procesit të legalizimit për dy objekte në zonën e Unazës se Re.

Zona e Unazës së Re, e cila dikur administrohej nga Komuna Kashar, ka me dhjetëra pallate që kanë  filluar 10-15 vjet të shkuara nga ndërtues që më pas i kanë braktisur pasi i kanë shitur, duke krijuar një plage sociale shumë të theksuar.

Lame duke u përballur në  këtë situatë, ka tërhequr vëmendje duke kujtuar edhe një herë listën e zezë të ndërtuesve që  braktisin pallatet e nisura dhe aplikojnë për leje të  tjera ndërtimi.

“Ne do të komunikojmë sërish me Bashkinë me qëllim që subjekte të tilla të papërgjegjshme të mos mund të aplikojnë për ndërtime të reja pasi kanë braktisur një herë banorët në pallate të mëparshme”, u shpreh Lame.

“Ne kemi bërë para disa kohësh një letër Bashkisë  ku listonim subjekte që  kishin shkelur lejen e ndërtimit dhe kishin braktisur pallatet e nisura dhe ai bashkëpunim funksionoi. Ka ardhur momenti ta rinovojmë këtë bashkëpunim, në të mirë të qytetarëve. “Stop, subjekteve të tilla që e lënë situatën në këtë gjendje nuk duhet të marrin më leje ndërtimi që jua sjellin njerëzve në majë të hundës për shkak të aventurave te tyre”, tha Lame.

Dy pallatet e ndërtuara nga Lorena sh.p.k janë të braktisura nga investitori, ndaj drejtorisë kompetente i ka lindur detyrimi ligjor për të vijuar procedurat e legalizimit dhe regjistrimit me banorët që zotërojnë njësitë e banimit dhe të shërbimit.

Kreu i Kadastrës Lame ju ka bërë thirrje banorëve, të cilët nuk e kanë më suportin e investitorit për t’i pajisur me certifikatë pronësie, të bëhen bashkë për ta përfunduar vetë në bashkëpunim me drejtorinë vendore.

“Procesi i hipotekimit apo certifikimit të pallateve të cilët janë braktisur nga investitori, apo kur investitori ka humbur jetën dhe pallatet kanë shkelur lejen e ndërtimit janë trajtuar nga ana jonë. Në të gjithë vendin, nëpërmjet këtij procesi janë legalizuar 921 pallate me një sipërfaqe 2.350.000 m2”, tha drejtori i Kadastrës.

Ai ka theksuar se banorët duhet të bashkëpunojnë me Kadastrën, duke zgjedhur një administrator për ta bërë procedurën dhe komunikimin më të thjeshtë me zyrat tona.

“Bëhuni bashkë siç janë bërë banorët e këtyre pallateve të cilët në pak kohë arritën ti japin fund kalvarit 20 vjecar të pritjes pa përgjigje”, tha Lame.

Vetëm në këto dy pallate janë legalizuar 232 njësi banimi.

Kreu i Kadastrës informoi banorëve se pas afatit 30 ditor te legalizimit të aplikojnë nga portalin e-Albania për t’u pajisur me certifikatën e pronësisë.

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.