FOKUS – BE: Veprime të shpejta për çmimet e larta të energjisë

BRUKSEL, 13 tetor /ATSH-DPA/ – Komisioni Evropian prezantoi sot atë që e quajti një “paketë masash” që shtetet anëtare të përdorin për të mbrojtur familjet dhe bizneset kundër rritjes së shpejtë të çmimeve të energjisë pa shkelur rregullat e konkurrencës të bllokut.

”Rritja aktuale e çmimeve kërkon një përgjigje të shpejtë dhe të koordinuar dhe kuadri ligjor ekzistues i lejoi BE -së të ndërmarrë veprime për të shqyrtuar ndikimet e menjëhershme”, tha KE.

Ndër masat e propozuara nga Komisioneri i Energjisë, Kadri Simson janë mbështetja e të ardhurave emergjente për familjet, ndihma shtetërore për kompanitë dhe uljet e synuara të taksave.

Komisioni po shqyrton gjithashtu reforma afatmesme për ta bërë tregun evropian të energjisë më elastik ndaj luhatjeve të çmimeve.

“Ndërsa dalim nga pandemia dhe fillojmë rimëkëmbjen tonë ekonomike, është e rëndësishme të mbrojmë konsumatorët e cenueshëm dhe të mbështesim kompanitë evropiane”, tha Simson.

“Komisioni po ndihmon vendet anëtare të marrin masa të menjëhershme për të zvogëluar ndikimin te familjet dhe bizneset këtë dimër”, shtoi ai.

Krijimi i një tregu evropian të energjisë duhet gjithashtu të merret parasysh.

Disa shtete anëtare kanë ndërhyrë tashmë në nivel kombëtar për të mbrojtur familjet private nga faturat tepër të larta të energjisë elektrike dhe ngrohjes./ a.jor.

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.