Ringritja e Teqesë së Dollmës në Krujë, monumenti u dëmtua rëndë nga tërmeti

TIRANË, 21 shtator/ATSH/ Ministrja e Kulturës, Elva Margariti solli në vëmendje një nga restaurimet e kryera përgjatë këtyre kohëve, ndërsa shtatori është shpallur muaji i trashëgimisë kulturore.

“Menjëherë pas tërmetit nisëm ringritjen e Teqesë së Dollmës në Krujë, një nga monumentet më të dëmtuara”, u shpreh Margariti.

Këshilli Kombëtar i Trashëgimisë Kulturore Materiale miratoi në muajin shkurt projektin e restaurimit të “Teqesë së Dollmës” Krujë në kushte të emergjencës, pas tërmetit të 26 nëntorit 2019.

Projekti i hartuar nga Instituti Kombëtar i Trashëgimisë Kulturore parashikon ndërhyrje konservuese dhe restauruese në elementët konstruktivë të teqesë.

Pas përforcimit të mureve, specialistët restauruan pikturën murale.

Teqeja e Dollmës është monument kulture i kategorisë së parë, ndërtuar në vitin 1778 dhe një nga më të rëndësishmit në qytetin e Krujës.

/j.p/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.