Fotogaleri – Piktori Zaim Elezi sjell penelatat e dashurisë hyjnore të nënës me fëmijën

TIRANË, 21 shtator/ATSH/ “Nana” titullohet ekspozita e piktorit Zaim Elezi, e çelur mbrëmjen djeshme në galerinë “FAB”.

Piktori Elezi sjell në ekspozitë një grup punimesh, që datojnë nga vitet ’80-të e deri më sot dhe që prezantohen për herë të parë për publikun.

Kuratori i kësaj ekspozite prof. Sadik Spahija tha në fjalën e tij në çeljen e ekspozitës se “Zaim Elezi prezanton punë që nga vitet ’80 e deri më sot, kohë që rrok dy sistemet, shumë ndryshime, por që ruajnë vetëm një dimension: dashurinë për nënën, parë kjo në 360 gradë”.

“Tema e amësisë ka prezantuar ndjenjën e dashurisë së thellë, lidhjen e pazgjidhshme dhe hyjnore që lidh nënën me fëmijën, duke mbetur një nga temat më të bukura dhe më tërheqëse në historinë e artit”, – tha Spahija.

Profesor Spahija u shpreh se “ajo çka dallojmë së pari që bën veçantinë e këtij autori në raport me temën, është se ai nuk ka reshtur së pikturuari nënën duke mbetur në thellësi tema e jetës në krijimtarinë e tij”.

Sipas tij, mjeshtëria e vizatimit e ndihmon ta ndjekë personazhin pa e trazuar, duke e përcjellë si kujtesë në ritualin e saj.

Sipas tij, piktori e modelon fort atë, duke kërkuar tridimensionalitetin, i cili në shumicën e rasteve e zotëron hapësirën.

Zaim Elezi ka qenë gjithnjë pjesë e përhershme e ekspozitave kombëtare dhe ndërkombëtare, nga fundi i viteve ’80 e në vazhdim, duke përmendur kështu ekspozitat personale në Zvicër, Francë, Itali, Maqedoninë e Veriut, Malin e Zi, Shqipëri, Kosovë etj. Ekspozita “Nana” qëndron e hapur për publikun deri më 30 shtator në FAB.

 

/j.p/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.