Lamtumira e fundit për fizioterapistin e Kombëtares, Ylli Mihali

TIRANË 14 shtator /ATSH-I.Vata/ Mjeku fizioterapist i Kombëtares shqiptare të futbollit, Ylli Mihali i cili ndërroi jetë mëngjesin e së hënës, 13 shtator, u përcoll ditën e sotme me nderime për në banesën e fundit.

Federata Shqiptare e Futbollit organizoi homazhet për të ndjerin në ambientet e stadiumit “Selman Stërmasi”.

Në këtë ceremoni morën pjesë presidenti i Federatës së Futbollit, Armand Duka, sekretari i përgjithshëm i FSHF-së, Ilir Shulku, familjarë, shokë, miq e dhjetëra anëtarë të komunitetit të futbollit, të cilët shprehën ngushëllimet për largimin e parakohshëm nga jeta të Ylli Mihalit.

Presideti  Duka, i prekur nga kjo ngjarje që ka trishtuar të gjithë botën e futbollit shqiptar shprehu ngushëllimet për familjen Mihali, duke theksuar se Ylli nuk ishte vetëm një profesionist i mirë, por mbi të gjitha një djalë i shkëlqyer.

“Sot është një ditë e trishtë, për mua dhe futbollin shqiptar. Kemi humbur një nga njerëzit më të mirë dhe më të dashur, i cili ka kontribuar për 27 vite në futbollin shqiptar. Mbase pak e kanë njohur në ndeshjet, por ata që kanë luajtur dhe ju mediat që keni qenë pranë ekipit Kombëtar e kanë ndjerë shumë. Një djalë i shkëlqyer dhe fizioterapist padyshim shumë i mirë, një njeri i pakursyer për të ndihmuar të tjerët. Më vjen keq që nuk arritëm që të gjithë ta ndihmonim, ta mbanim në jetë Yllin, por ishte e pamundur. Ky COVID-19 i mallkuar na ka dhënë shumë dhimbje të tjera gjithashtu dhe sot shumë dhimbje për futbollin shqiptar. Doja të ngushëlloja familjen, miqtë e Yllit, futbollistët të cilët kanë qenë të trishtuar jo vetëm ata që kanë luajtur për ekipin Kombëtar, por edhe ata që kanë kaluar nëpër ekipet Kombëtare. Nuk kam fjalë, u prehtë në paqe! Ai e ka shkruar historinë vërtetë, të paktën për ne që e kemi njohur nga afër nuk do ta harrojmë kurrë! Ashtu siç e kishte emrin, Yll ashtu ishte dhe në të vërtetë”, tha ai.

Ylli Mihali u nda nga jeta në moshën 55-vjeçare, pas një beteje të gjatë me COVID-19.

/j.p/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.