GJERMANI – 2/3 e qytetarëve mbështesin ndihmën ndaj refugjatëve afganë

BERLIN, 22 gusht /ATSH-DPA/ – Gati dy të tretat e gjermanëve janë në favor të dhënies së mbrojtjes në Gjermani qytetarëve nga Afganistani, të cilët janë nën kërcënim nga talebanët, sipas një sondazhi nga instituti i kërkimit të opinionit ”YouGov”.

Sondazhi në internet i porositur nga organizata e ndihmës ”Seebruecke” zbuloi se 63 për qind mbështesin qeverinë gjermane, që u ka ardhur në ndihmë afganëve, sidomos grave afgane dhe ata që përballen me persekutim politik.

Gjashtëdhjetë e katër përqind e të anketuarve gjithashtu kundërshtuan dëbimet nga qeveria gjermane të personave të persekutuar ose të rrezikuar në Afganistan, edhe pse dëbime të tilla nuk do të lejoheshin ligjërisht sidoqoftë.

Sipas qeverisë, dëbimet më të fundit ishin ato të kriminelëve apo terroristëve, megjithatë, dëbimet drejt Afganistanit janë pezulluar plotësisht.

Të paktën 84 për qind besojnë se ata që mbeten në Afganistan do të përballen me persekutim për shkak të pikëpamjeve të tyre politike, gjinisë, orientimit seksual ose përkatësisë fetare pas marrjes nën kontroll nga talebanët islamikë.

Sipas ”YouGov”, 1 048 të anketuarit në sondazh, i zhvilluar të enjten dhe të premten, ishin përfaqësues të popullsisë së rritur gjermane./ a.jor.

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.