Nis sot muaji i hapur i vaksinimit masiv +18 vjeç, Manastirliu: Paraqituni me kartën e identitetit

TIRANË, 1 gusht/ATSH/ Ministrja e Shëndetësisë dhe Mbrojtjes Sociale Ogerta Manastirliu apeloi qytetarët të vaksinohen ndërsa nis sot muaji i hapur i vaksinimit antikovid për të gjithë qytetarët +18 vjeç.

Teksa ka bërë apel të vaksinohen, Manastirliu shprehet se me kartën e identitetit qytetarët mund të paraqiten në çdo qendër vaksinimi ose në qendrën e tyre shëndetësore për të kryer vaksinimin ndaj COVID-19.

“Nis sot muaji i hapur i vaksinimit masiv për çdo qytetar +18 vjeç. Me kartën e identitetit, ju mund të paraqiteni në qendrën tuaj shëndetësore ose në qendrën më të afërt të vaksinimit për të kryer vaksinën antiCOVID. Qendrat e vaksinimit që do të jenë të hapura nga ora 08:00-20:00”, theksoi ajo.

Nga data 1 deri 31 gusht do të jetë vaksinimi i hapur për të gjitha moshat +18 vjeç dhe qendrat e vaksinimit do të jenë të hapura nga 08:00-20:00 për qytetarët.
Deri tani janë kryer në total 1,198,933 doza vaksine ndaj COVID-19 në vendin tonë. /j.p/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.