GJERMANI – Të pavaksinuarit përballen me kufizime sociale

BERLIN, 25 korrik /ATSH-DPA/ – Të pavaksinuarit kundër Covid-19 në Gjermani mund të përballen me kufizime sociale gjatë muajve të ardhshëm, paralajmëroi ministri federal për Çështjet Speciale, Helge Braun, në një intervistë të botuar sot.

”Nëse Gjermania goditet nga një valë e ashpër e katërt e koronavirusit në muajt e ardhshëm, njerëzit që ende nuk janë vaksinuar mund të zbulojnë se janë bllokuar për të hyrë në bare dhe institucione të tjera shoqërore”, tha Helge Braun për ”Bild am Sonntag”.

“Nëse kemi një shkallë të lartë të infeksionit pavarësisht procedurave tona të testimit, atëherë të pavaksinuarit do të duhet të zvogëlojnë kontaktet e tyre”, theksoi ai.

“Kjo mund të nënkuptojë që opsione të caktuara si restorante, kinema dhe stadiume, madje edhe për njerëz të pavaksinuar që janë testuar negativ, nuk do të jenë më të mundshme, sepse rreziku për të gjithë të tjerët është shumë i lartë”, shtoi Braun.

Por, Braun, i cili është gjithashtu mjek, tha se, për sa kohë që vaksinat që përdoren aktualisht funksionojnë mirë kundër variantit Delta të koronavirusit, një bllokim i plotë duhet të jetë i panevojshëm.

Ai gjithashtu përdori intervistën për të nxitur gjermanët që të vaksinohen duke argumentuar se vaksinat janë rreth 90 për qind efektive në ndalimin e sëmundjes serioze.

Rreth 60 për qind e popullsisë së Gjermanisë ka marrë të paktën një dozë vaksine./ a.jor.

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.