Përurohet në Kolonjë shtatorja e Sali Butkës, Kryebashkiaku Isai: T’i vlerësojmë të gjithë patriotët

TIRANË, 24 korrik/ATSH/- Busti i Sali Butkës, një nga udhëheqësit dhe luftëtarët e lëvizjes kombëtare shqiptare është vendosur në qendër të qytetit të Ersekës në shenjë nderimi për veprimtarinë çlirimtare.

Shtatorja e Sali Butkës, e punuar nga skulptori Agim Rada Shtatorja është vendosur në lulishten Rinia përballë Gjimnazit “Petro Nini Luarasi”.

Kryetari i Bashkisë së Kolonjës, Erion Isai e cilësoi ceremoninë si të vonuar.

“Na takon që në këtë copë tokë t’i vlerësojmë të gjithë patriotët që kanë kontribuar, jo vetëm për Kolonjën, por për gjithë Shqipërinë. Sali Butka është figurë e tillë që e meriton këtë vëmendje”, tha Isai.

Nipi i tij, Uran Butka është shprehur se “figura e Sali Butkës përfaqëson mendimtarin rilindas, veprimtarin e pavarësisë, njeriu që luftoi dhe vdiq për çështjen kombëtare”.

“Luftoi jo vetëm për lirinë dhe pavarësinë e kësaj treve, por edhe të gjithë Shqipërisë. Krijoi çetat e para në histori dhe bashkë me Petro Ninin Luarasin, punoi për përhapjen e diturisë. U caktua për të mbrojtur qeverinë e Ismail Qemalit dhe të Vlorës nga një sulm që i bëhej nga forcat turke që ishin në Fier. Ai u përball me ushtritë greke që vinin të pushtonin në Korçë. Kulmi i veprimtarisë historike të Sali Butkës është shpallja e republikës shqiptare të Korçës në dhjetor të vitit 1916. Dhe ai deri në momentet e fundit të jetës luftoi për Shqipërinë e lirë, të pavarur e demokratike”, u shpreh Uran Butka.

Historiani Niko Kotherja e vlerësoi Butkën duke thënë se ai ka lobuar për arsimimin e brezave dhe patriotëve në Kolonjë.

” Unë besoj se ka ardhur koha për ta sjellë këtë personalit në parametrat e tij të vërtetë. Është një personazh, i cili ka kontribuuar masivisht për çeljen e shkollave në zonën e Kolonjës”, tha historiani  Kotherja.

Kryeinspektori i Përgjithshëm, Shkëlqim Hajdari u shpreh se “sot Saliu bëhet me bust në Ersekë, kështu që Saliu dhe Themistokliu që ishin bashkëluftëtarë, bashkëkombas që mbi interesat e ngushta fetare, vendosën interesat kombëtare. Besoj që Themistokliu nga bashta Gërmenji duhet të jetë i lumtur nga aty ku ndodhet, sepse edhe shoku, miku vëllai e miku i tij u vendos aty ku e meriton, shtatorja e madhe e Sali Butkës”.

Ai tha se “këto dy figura të Korçës e Kolonjës, me veprën që kanë bërë rrezatojnë frymëzim për brezat e rinj që i tregojnë me veprën e tyre që të duash atdheun duhet të sakrifikosh. E gjithë vepra e Gërmenjit dhe Butkës është e jashtëzakonshme. Besoj që të gjithë duhet të jemi të përgjegjshëm që figurat si Sali Butka, me shumë vonesë vendosja e bustit e tij, të studiohen dhe të vlerësohen denjësisht”.

“Petro Nini është një tjetër mik, bashkëkohës i Sali Butkës. Po bashkëbisedonim me miq, që janë historianë, akademikë. Sugjerimi i radhës ishte që nëse do gjenden kushtet, t’i afronim këta dy patriotë të mëdhenj përballë njëri-tjetrin dhe të vazhdonin të bisedonin edhe në botën e përtejme sepse edhe kjo tregon që shqiptarët në momentet e vështira të këtij kombi kanë treguar se nuk kanë parë përkatësitë fetare,  por i ka bashkuar atdheu dhe kombi. Ndoshta vitin tjetër mendoj që përballë Sali Butkës do të kemi Petro Nini Luarasin”, tha Hajdari.

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.