Kangjellat mbrojtëse anash rrugëve, Veliaj: Gjykata na urdhëron t’i heqim, ato mbrojnë jetë njerëzish

TIRANË, 24 korrik/ATSH/ Kryetari i bashkisë së Tiranës, Erion Veliaj ka përmendur sot një vendim absurd të gjykatës, për të hequr rrethimet mbrojtëse anash rrugëve të Tiranës, çka ai e ka quajtur skandaloz dhe të marrë nën lobimin e pronarëve të lokaleve apo lavazheve.

Veliaj tha se kangjellat mbrojtëse janë aty sepse shpëtojnë jetën e qytetarëve.

“Kam parë këtë javë disa vendime skandaloze gjykatash, të cilat urdhërojnë bashkinë e Tiranës të heqë kangjellat mbrojtëse anash rrugëve. Flas për rrugën e Kombinatit dhe rrugën “Dritan Hoxha”. Ato kangjella e kanë çuar në zero nivelin e aksidenteve të fëmijëve apo të të moshuarve. Sigurisht, edhe në Londër, edhe në Paris, kam parë kangjella mbrojtëse në rrugët kryesore, për të orientuar qytetarët që të kalojnë vetëm në semafor.”, – theksoi Veliaj.

Sipas tij, këto janë vendime gjykatash që i lobon një gomisteri, që i lobon një lavazh apo një lokal.

“Ndaj, kur më keni parë që e përshëndes reformën në drejtësi, bëhet fjalë edhe për raste të tilla, krejtësisht banale, kur bashkia e Tiranës merr një masë administrative, kurse gomisteria, lavazhi apo lokali paguajnë gjykatësin të urdhërojë bashkinë e Tiranës të heqë kangjellat që mbrojnë jetë. Kjo nuk funksionon”, – tha Veliaj./k.s//a.a/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.