FRANCË – Parlamenti miraton ligjin kundër islamizmit radikal

PARIS, 24 korrik /ATSH-DPA/ – Pas muajsh diskutimesh, deputetët e Asamblesë Kombëtare franceze miratuan një ligj të diskutueshëm që synon të luftojë Islamizmin radikal dhe forcimin e parimeve republikane.

Ligji ka të bëjë veçanërisht me lehtësimin e shpërbërjes së shoqatave që vënë në dyshim vlerat franceze, luftimin e martesave të detyruara dhe ndëshkimin e gjuhës së urrejtjes në internet.

Presidenti Emmanuel Macron dhe qeveria e tij duan të kundërshtojnë ndikimin e Islamit radikal, ku të rinjtë janë më të prekshëm si në disa xhami, jashtë shkollës dhe në internet.

Macron njoftoi ligjin e ri në tetor, duke u zotuar të godasë separatizmin islamik pasi një seri sulmesh vranë më shumë se 250 njerëz.

“Ne po i japim vetes mjetet për të luftuar ata që abuzojnë me fenë dhe që vënë në dyshim vlerat e republikës”, theksoi ministri i Brendshëm Gerald Darmanin.

Ndërsa kryeministri Jean Castex ka theksuar vazhdimisht se ligji nuk ishte i drejtuar kundër fesë, kritikët thonë se ka elementë në të që dëmtojnë pjesën myslimane të popullsisë./ /os/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.