Kakavijë, sekuestrohen medikamente mjekësore kontrabandë me vlerë 2200 euro

TIRANË, 13 qershor/ATSH/ Një sasi e konsiderueshme ilaçesh të pashoqëruara me dokumentacionin përkatës janë sekuestruar nga strukturat doganore në Pikën Kufitare të Kakavijës, ndërsa është arrestuar në flagrancë poseduesi.

“Strukturat Doganore në bashkëpunim me shërbimet e Policisë Kufitare në Kakavijë dhe shërbimet Frontex, si rezultat i shtimit të kontrolleve me qëllim parandalimin dhe goditjen e paligjshmërisë, bazuar në analizën e riskut kanë përzgjedhur për kontroll të detajuar një mjet kamion që drejtohej nga shtetasi D. K. Gjatë kontrollit të ushtruar në automjet, nga agjencitë ligj zbatuese, u gjetën të fshehura në kabinën e kamionit 4 qese, brenda të cilave kishte medikamente mjekësore (ilaçe) me vlerë totale 2 200 euro, të pa shoqëruara me dokumentacionin përkatës”, bën të ditur Drejtoria e Doganave.

Pas veprimeve të kryera hetimore, specialistët e seksionit të hetimit të krimit ekonomik e financiar në DVP Gjirokastër arrestuan në flagrancë shtetasin D. K, 30 vjeç, banues në Fier.

Materialet në ngarkim të shtetasit të mësipërm i kaluan Prokurorisë pranë Gjykatës së Shkallës së Parë Gjirokastër, për veprën penale “Kontrabanda me mallra të licencuar”

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.