Familja mbretërore kujton princin Philip në 100-vjetorin e lindjes

LONDËR, 10 qershor /ATSH-DPA/ – Familja mbretërore kujtoi sot Dukën e Edinburgut në ditën që ai do të kishte mbushur 100 vjeç.

Princi Philip vdiq më 9 prill, vetëm nëntë javë para 100-vjetorit të tij të rëndësishëm.

Princesha Eugenie shkroi në Instagram: “Duke menduar për gjyshin në atë që do të kishte qenë 100-vjetori i lindjes së tij”.

Princesha ndau një imazh të gjyshërve të saj, Philip dhe Elizabeth në dasmën e saj në 2018, ndërsa ata qëndronin të buzëqeshur jashtë Chapel St. George, në kështjellën Windsor.

“Clarence House” postoi një fotografi bardhezi të arkivit, ku Charles dyvjeçar mban dorën e babait të tij, ndërsa Princi Philip, i veshur me një kostum dhe syze dielli, e përshëndet atë pasi është kthyer në shtëpi nga një udhëtim në Maltë në 1951.

“Duke kujtuar Dukën e Edinburgut, në atë që do të kishte qenë ditëlindja e tij e 100-të”, shkruhet në postimin në llogarinë zyrtare në Instagram të Princit të Uellsit dhe Dukeshës së Cornëall-it.

Ai përfshinte gjithashtu një imazh të Philip në Windsor në korrik të vitit 2020.

Mbretëresha shënoi me hidhërim rastin me mbjelljen e një specieje të sapokrijuar trëndafili, me emrin e bashkëshortit të saj të dashur të ndjerë.

Duka dhe Dukesha e Kembrixhit gjithashtu përkujtuan përvjetorin, me një postim në llogarinë e tyre në Twitter: “Sot ne kujtojmë Lartmadhërinë e Tij Mbretërore, Dukën e Edinburgut, në atë që do të kishte qenë 100-vjetori i lindjes së tij”./ /ervo/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.