MOSKË – Rusia shpall SHBA-në dhe Republikën Çeke “jomiqësore”

MOSKË, 14 maj /ATSH-AFP/ – Rusia njoftoi se e ka klasifikuar Republikën Çeke dhe SHBA-në në një listë të “vendeve jomiqësore”, një vendim i marrë në sfondin e tensioneve në rritje ruso-perëndimore, e shenjuar nga dëbime të shumta të diplomatëve.

Sipas një dekreti qeveritar të nënshkruar të enjten, dy vendet u përfshinë në këtë listë të krijuar rishtas për “kryerjen e veprimeve jomiqësore” që synojnë Rusinë, qytetarët rusë ose organizatat ruse.

Nënshkrimi i këtij dekreti vjen disa ditë para takimit të parë të kreut të diplomacisë ruse, Sergei Lavrov dhe Sekretarit amerikan të Shtetit, Antony Blinken, në samitin e Këshillit të Arktikut më 20 maj, në Islandë, që do të përgatisë një takim Biden – Putin në qershor.

Tensionet midis Moskës dhe kryeqyteteve perëndimore janë rritur në muajt e fundit për një gamë të gjatë çështjesh, nga fati i disidentit rus të burgosur, Alexei Navalny, te çështja ukrainase ose te akuzat e përsëritura për sulme kibernetike dhe spiunazh./ /ervo/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.