Varhelyi: Shqipëria mund të ndahet nga Maqedonia e Veriut për negociatat

TIRANË, 6 maj /ATSH/ Shqipëria dhe Maqedonia e Veriut deri tani janë trajtuar bashkë në rrugën e integrimit në Bashkimin Europian.

Por problemet që Shkupi po has me Sofjen për çështje të karakterit historik, mund të bëjë që BE të vendosë për mbajtjen e Konferencës së parë Ndërqeveritare vetëm me Shqipërinë. Mundësia që një gjë e tillë të ndodhi është lënë e hapur nga Komisioneri për Zgjerimin, Oliver Varhelyi në një intervistë për Euronews.

– Si po shkojnë bisedimet rreth hapjes së negociatave, për procesin e zgjerimit sidomos për Shqipërinë, a ka ardhur drita jeshile nga Komisioni për të nisur Konferencën e Parë Ndërqeveritare së shpejti apo janë ende në pritje?

Në fakt, nuk e jep Komisioni dritën jeshile. Komisioni jep propozimin tek Këshilli i Ministrave të BE ku bëjnë pjesë vendet anëtare, dhe ku vendet anëtare marrin vendimet. Gjykimi ynë është që të dyja shtetet, edhe Maqedonia e Veriut edhe Shqipëria i kanë përmbushur të gjitha kushtet për të organizuar Konferencën e parë ndërqeveritare.

Kam shpresë se ne do të mund ta mbajmë konferencën e parë ndërqeveritare në qershor të këtij viti. Nëse, përballemi sërish me vështirësi me Maqedoninë e Veriut që do të thotë, nëse jemi të pasuksesshëm në bindjen e Bullgarisë dhe Maqedonisë së Veriut që të arrijnë një zgjidhje të përbashkët, atëherë pyetja që ngrihet është, nëse mund të vazhdojmë para vetëm me Shqipërinë, dhe do të na duhet ta konsiderojmë atë pyetje.

– Pra ndarja e vendeve është një opsion i mundshëm?

Mund të jetë një opsion, po. Komisioni Europian pritet të rekomandojë mbajtjen e Konferencës së parë Ndërqeveritare në samitin e qershorit të liderëve të Bashkimit Europian. Vendet e Bashkimit Europian më pas do të zgjedhin nëse do ta miratojnë një hap të tillë për Shqipërinë dhe Maqedoninë e Veriut.

Shkupi duket se ka ende një situatë të bllokuar politike me Sofjen për sa i përket çështjeve të kontekstit historik.

Deri vitin e shkuar nga vendet e BE është mbrojtur qëndrimi që Shqipëria dhe Maqedonia e Veriut të vijojnë hapat njëkohësisht dhe të mos ndahen në proces. Por sot u raportua se KE mund të propozojë më parë nisjen e konferencës ndërqeveritare me Shqipërinë.

Prej 1 janarit të këtij viti presidencën e radhës të Këshillit të Bashkimit Europian e kryeson Portugalia. Në korrik kryesimi i presidencës i kalon Sllovenisë. /Euronews/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.