“Ne hapim rrugë, ata bllokojnë rrugë”/ Veliaj në Kombinat: Vaj-medet nëse bllokojnë shtetin siç kanë bërë me çdo investim të rëndësishëm

TIRANË, 22 prill /ATSH/ Erion Veliaj, drejtuesi politik i Partisë Socialiste për Tiranën, së bashku me Belinda Ballukun zhvilluan një takim me banorë të Kombinatit, lagje e cila mandatin e tretë do transformohet totalisht falë projektit të rindërtimit.
Veliaj tha se Partia Socialiste është për të hapur rrugë, e për të bërë investime e jo për të bllokuar e për të prishur, ashtu siç bëjnë kundërshtarët politikë.
“Politika është për të hapur rrugë, prandaj janë hapur 2 tunele poshtë Astirit dhe prandaj po punohet me 3 turne, sepse politika është mjeti me të cilat hapen rrugët nuk bllokon rrugët. Shikoni palën tjetër, erdhën në Kombinat duke xhiruar gomat skena që nuk i kishim parë që në vitet ’90. Erdhën në Kombinat duke hipur mbi makina”, theksoi kryebashkiaku.
“Njerëzit”, – vijoi Veliaj, – “duhet të dinë se nëse PD drejton shtetin, do të bllokojë siç ka bërë këto vite e siç po bën edhe në fushatë me makina të shtrenjta”.
“Sikur t’i japin timonit të shtetit, siç i japin timonit të makinave, sikur të ndotin mjedisin siç ndotin me ato marmitat e tymin e tyre, sikur të bllokonin shtetin siç bllokojnë çdo rrugë vaj-medet. Pyetja është: Këtu në Kombinat e kemi ne zgjuarsinë, e kemi ne kujtesën, e kemi ne fuqinë e kurajës për t’i thënë “jo” të kaluarës dhe për t’i thënë “po” të ardhmes, Belindës, Edit, Partisë Socialiste? Sepse kjo është zgjedhja”, u shpreh Veliaj.
Ndërsa ministrja e Infrastrukturës dhe Energjisë, Belinda Balluku, njëkohësisht kandidate e PS-së për zgjedhjet e 25 Prillit tha se është krenare për punën e bërë në Kombinat nga Bashkia Tiranë, teksa theksoi se Partia Socialiste nuk do ndalet me kaq, por do vijojë punën deri në fund.
/r.e/
Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.