POLONI – Numër rekord mjekësh planifikojnë të punojnë jashtë vendit

VARSHAVË, 20 prill /ATSH-PAP/ – Një numër rekord mjekësh kanë deklaruar plane për të punuar jashtë vendit në tremujorin e parë të këtij viti, njoftoi Këshilli i Lartë i Mjekëve (NRL).

“Afër 200 dëshmi betimi që mundësojnë punësimin në vend të huaj u janë lëshuar mjekëve në tre muajt e parë të vitit, më shumë se në çdo tremujor tjetër të regjistruar”, tha kreu i NRL, Andrzej Matyja.

“Asnjëherë më parë shifra tremujore nuk ka qenë kaq e lartë”, shtoi ai.

Matyja paralajmëroi se migrimi në rritje i mjekëve nga Polonia kërcënon me mungesa të mëdha në personel pas pandemisë Covid-19, gjë që, nga ana tjetër, mund të privojë pacientët me sëmundje të tjera nga kujdesi i duhur mjekësor.

Sipas një raporti të vitit 2020 nga Universiteti i Ekonomisë në Krakov, 9 % e mjekëve të Polonisë planifikojnë të emigrojnë pas pandemisë, 6 % duan të largohen nga profesioni i mjekut.

Shifrat përkatëse për personelin infermieror janë 3,8 dhe 6,3 %./ /ervo/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.