FOKUS – BE: Përparime në bisedimet bërthamore

BRUKSEL, 20 prill /ATSH-AA/ – Kreu i diplomacisë së Bashkimit Europian (BE), Josep Borrell deklaroi se bisedimet në Vjenë për ringjalljen e marrëveshjes bërthamore iraniane kanë përparuar. 

“Ekziston një vullnet i mirë te të dy palët për të arritur një marrëveshje”, theksoi Borrell për gazetarët pas një video-konference të kryediplomatëve të vendeve të BE-së, duke iu referuar bisedave të tij të fundit me sekretarin e shtetit të SHBA-së, Anthony Blinken dhe kryediplomatit iranian, Mohammad Javad Zarif.

“Gjatë bisedimeve partnerët janë zhvendosur nga çështjet e përgjithshme në çështjet më të përqendruar, që janë nga njëra anë heqja e sanksioneve dhe nga ana tjetër zbatimi bërthamor”, shtoi Borrell.

Ai tha se vendimi i SHBA-së për të rifilluar negociatat meqenëse hapi dyert për Iranin për t’u kthyer në zbatimin e plotë të marrëveshjes bërthamore e bën botën një vend më të sigurtë.

Diplomacia e BE-së ka bërë përpjekje të konsiderueshme për të rikthyer Iranin dhe SHBA-në në tryezën e negociatave që kur tensionet u rritën midis dy vendeve.

Marrëveshja bërthamore, e njohur zyrtarisht si Plani i Përbashkët Gjithëpërfshirës i Veprimit (JCPOA), u nënshkrua në vitin 2015 nga Irani, SHBA, Kina, Rusia, Franca, Mbretëria e Bashkuar, Gjermania dhe BE-ja.

Sipas marrëveshjes, Teherani u zotua se do të kufizojë aktivitetin bërthamor dhe në këmbim fuqitë botërore u pajtuan të heqin sanksionet e tyre ekonomike ndaj Iranit.

Por në vitin 2018, SHBA nën ish-presidentin e SHBA-së, Donald Trump, u tërhoq në mënyrë të njëanshme nga marrëveshja dhe rivendosi sanksione mbi Iranin, duke çuar në mos përmbushjen e obligimeve të marrëveshjes nga Teherani./ /ec/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.