Aeroporti i Vlorës, punimet nisin brenda 14 muajsh/ Balluku: Për herë të parë fluturime transoqeanike dhe shërbim kargo

TIRANË, 20 prill /ATSH/ Ministrja e Infrastrukturës dhe Energjisë, Belinda Balluku u shpreh sot  gjatë ceremonisë së nënshkrimit të kontratës për ndërtimin e aeroportit ndërkombëtar të Vlorës me kompaninë fituese, bashkimin e kompanive të regjistruara në Zvicër, Mabco Construction, i përbërë nga Mabetex Group, YDA Group dhe A Group sh.p.k se “pavarësisht vonesave që u krijuan për shkak të pandemisë, tashmë ka marrë udhë dhe sot jemi para faktit historik, ashtu siç ishte aeroporti i Kukësit për aviacionin civil, firmosjen e kontratës koncesionare midis qeverisë shqiptare dhe konsorciumit fitues të aeroportit ndërkombëtar të Vlorës”.

Balluku tha se, “aeroporti ndërkombëtar i Vlorës është në strategjinë tonë të aviacionit civil, një nga veprat më të mëdha që është dizenjuar për të akomoduar të gjitha fluturimet kudo në botë dhe ato transoqeanike, që deri më sot nuk janë ofruar nga vendi ynë për shkak të pistës jo të përshtatshme në aeroportin e Rinasit”.

Sipas saj, puna për aeroportin e Vlorës nuk është ndalur, pavarësisht vështirësive nga pandemia. Ky aeroport do të jetë i kategorisë 4E, një nga kategoritë më të larta me standardet europiane.

Përveç aviacionit civil në këtë aeroport ka edhe dy sektorë të tjerë të aviacionit civil, që janë mirëmbajtja e avionëve, që nuk ka ndodhur më parë në Shqipëri, dhe kargo.

“Mirëmbajtja ose hangarët do të jetë një sektor i ri i zhvilluar në aeroportin e Vlorës që do të sigurojë të ardhura dhe do të nxisë punësimin dhe profesionistët e rinj që duhet të zhvillohen në vendin tonë duke i hapur rrugë ngritjes së Akademisë së Avionëve, që sigurisht kjo do të ndodhë në Vlorë”, tha Balluku.

“Kargo do të jetë tjetër aspekt që do të sjellë zhvillim. Aeroporti me pistën e tij 8 km do të akomodojë të gjitha fluturimet me transportin e mallrave përmes ajrit e do të shënojë një hap të ri në transportin shqiptar”, – tha ajo.

Punimet në aeroportin e Vlorës nisin brenda 14 muajsh dhe do të ketë edhe një studim arkeologjik. Më pas 8 muaj do të jenë në dispozicion për përmbushjen e kushteve paraprake. Dhe 6 muaj për marrjen e licencave të nevojshme të mjedisit, ndërtimit.

Faza e parë përfshin ndërtimin e terminalit të pasagjerëve dhe parashikon sipas kontratës 36 muaj, ndërsa faza e dytë që konsiston në zgjerimin e terminalit të pasagjerëve do të përfundojë pas vitit 4 të fillimit të operimeve.

“Ky investim do të injektojë mbi 100 milionë USD invstime në ekonomi dhe do të nxisë zhvillim. Vijojmë straregjinë për rrjetin e aeroporteve për zhvillimin e turizmit”, – tha Balluku.

/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.