Padi e re në SPAK/ Vokshi: Legalizimet në shkëmbim të votës, krim elektoral

TIRANË, 12 prill /ATSH/ Kandidatja e PD në qarkun e Tiranës, Albana Vokshi denoncoi sërish Ogerta Manastirliun në SPAK për çështjen e legalizimeve në këmbim të votave.

Pas asfaltit elektoral në njësinë 9, Vokshi theksoi se ka dëshmi të banorëve për këtë krim zgjedhor të Ministres së Shëndetësisë tek njësia 9 në Tiranë.

“Ogerta Manastirliu, Artan Lame, drejtues të zyrës së Kadastrës, janë vënë në shërbim të këtij krimi elektoral dhe korrupsioni zgjedhor. Askush nga këta që trajtojnë si leckë qytetarin për t’i blerë votën me legalizimin që u takon, nuk do t’i shpëtojë drejtësisë”, – tha  Vokshi.

Përpjekjet e paligjshme të qeverisë për blerjen e votës Vokshi i cilësoi si agoninë e pushtetit që meriton të largohet në 25 prill. Ajo tha se këto akte nuk janë ndryshimi që duan qytetarët.

“Kur Ogerta Manastirliu apo çdokush tjetër nga ky pushtet i kalbur prej korrupsionit ju troket në derë për t’ju shitur si nder diçka që ju takon me ligj, në këmbim të votës, ju duhet ta dini se në derë po ju troket dështimi për herë të tretë. Ajo që duhet të bëjmë është të mos ia hapim derën dështimit. Braktiseni këtë pushtet të korruptuar, jo njerëzor, siç ju kanë braktisur këta për 8 vjet me radhë! Ndëshkojeni me votë! Këta duhet t’i çojmë në shtëpi në 25 prill dhe të hapim rrugën për t’i çuar para drejtësisë për çdo qindarkë që na kanë vjedhur”, u shpreh Vokshi.

/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.