Printimi i fletëve të votimit për 25 prillin/ Kompania fituese letër KQZ-së

TIRANË, 4 prill/ATSH/ Kompania “Cetis”, e cila ka fituar tenderin për printimin e fletëve të votimit për zgjedhjet e 25 prillit, shpreh shqetësimin për përmasat e mëdha të fletës së votimit.

Përmes një letre të drejtuar KQZ-së, kompania vë në dijeni institucionin për disa limite në procesin e printimit që çdo kompani mund të përballet në një projekt të ngjashëm si ky i prodhimit të fletëve të votimit.

“Pasi ne kemi marrë të gjithë informacionin e nevojshëm për numrin e fletëve të votimit që do të duhet për qendrat e votimit, ne kemi bërë dizenjimin dhe formatin e tyre, përfshirë kohën që duhet për printimin final. Pas marrjes së konfirmimit, pasi ne të kemi dizenjuar fletën e votimit, do të na duhet kohë për të përgatitur e shkuar në printim sipas konfirmimit të marrë nga KQZ”, thuhet në letër.

“Zakonisht ky proces merr 1 deri në 2 ditë dhe varet nga disa faktorë të brendshëm. Printimi në vetvete i 3.6 milionë fletë votimi me përafërsi merr 14 ditë pune dhe vijimësia e procesit të printimit varet nga prodhimi. Ne mbërrijmë në konkluzionin se “fleta e votimit me përmasa të cilat ne kemi parë do të duhet për t’u printuar më shumë se 20 ditë, në mënyrë të përfundojmë me sukses të gjithë numrin e kërkuar dhe në fund duhet t’i shtojmë edhe dy ditë të tjera për t’i dorëzuar këto në qendrat e votimit nga KQZ, vijon letra.

“Për sa i përket fletës së votimit të Tiranës, e cila është me e gjatë se formati A3, do të na duhet të porosisim letër të kësaj madhësie, gjë e cila kërkon 2 deri në 3 javë, përfshirë këtu dhe kohëzgjatjen në printim, siç e shpjeguam më sipër. Një fletë votimi e të tilla përmasave do ta zvogëlonte printimin në kohë nga makineritë tona për një sërë arsyesh teknike dhe logjistike”, vijon kompania.

“Të gjithë faktet që ne ju sjellim përmes kësaj letre tregojnë se fatkeqësisht suksesi dhe siguria në printim dhe dërgim të fletëve të votimit në harkun kohor të 10 ditëve, në periudhën 12-22 prill do të jetë një mision i pamundur”, thuhet në letër. /j.p/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.