LONDËR, 11 mars /ATSH-AFP/ – Qeveria britanike mbështeti sot vaksinën e zhvilluar nga laboratori britanik AstraZeneca dhe Universiteti i Oxford-it pas pezullimit në Danimarkë, duke e gjykuar të sigurt dhe efikase.
Ajo siguroi se vaksina do të vazhdojë të përdoret në Britaninë e Madhe.
“Ne kemi qenë shumë të qartë se vaksina është e sigurt dhe efikase”, deklaroi një zëdhënës i kryeminsitrit, Boris Johnson për shtypin.
Ai shtoi se kur njerëzit thirren për t’u paraqitur ta marrin ata duhet të kenë besim të plotë.
Vend i Europës, më i prekuri nga pandemia me rreth 125 000 të vdekur, Britania e Madhe ka vaksinuar tashmë më shumë se 22 milionë persona me dozën e parë, duke përdorur për momentin vetëm vaksinat e Pfizer/BioNTech dhe të Oxford/AstraZeneca.
Danimarka pezulloi sot vaksinën e AstraZeneca në një kohë kur Bashkimi Europian po bëhet gati të bëjë të vlefshme atë të Johnson & Johnson kundër COVID-19./ /ec/