SHBA – Biden: Vizita e Papa Françeskut në Irak një simbol shprese

UASHINGTON, 8 mars /ATSH-DPA/ – Presidenti amerikan, Joe Biden e quajti vizitën e Papa Françeskut në Irak një simbol shprese për të gjithë botën.

“Vizita e Papa Françeskut dërgoi një mesazh të rëndësishëm rreth vëllazërimit dhe paqes”, tha Biden në një deklaratë.

“Të shohësh Papa Françeskun të vizitojë vendet e lashta fetare, përfshirë vendlindjen biblike të Abrahamit, të kalojë kohë me Ajatollahun e Madh Ali al-Sistani në Najaf dhe të ofrojë lutje në Mosul, një qytet që vetëm disa vjet më parë duroi prishjen dhe intolerancën e një grup si ISIS, është një simbol shprese për të gjithë botën”, shtoi ai.

Presidenti theksoi se vazhdon ta admirojë Papa Françeskun për angazhimin e tij në promovimin e tolerancës fetare, lidhjeve të përbashkëta të njerëzimit dhe mirëkuptimit ndërfetar./ /ervo/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.