TIRANË, 2 mars/ATSH/ Qendra shëndetësore Katund Sukth, në Durrës sot garanton paketën e plotë të shërbimeve të kujdesit parësor, në kushte dhe standarde bashkëkohore, njësoj si 300 qendrat e rindërtuara në këto 4 vite, pa dallim, si në qendër të qyteteve dhe në zonat më të thella të vendit.
Ministrja e Shëndetësisë dhe Mbrojtjes Sociale, Ogerta Manastirliu, ka inspektuar Qendrën e re Shëndetësore në Sukth – Katund i Ri, e rehabilituar në kuadër të Programit të 300 Qendrave Shëndetësore, e cila i shërben 4 mijë banorëve të kësaj zone.
“Tashmë me përmirësimin e infrastrukturës së 300 qendrave shëndetësore, ne do të vijojmë me kujdesin dhe mbështetjen për grupet në nevojë, duke i kthyer qendrat shëndetësore në qendra që ofrojnë shërbim dhe kujdes socio-shëndetësor”, nënvizoi Ministrja.
Duke e konsideruar moment delikat të pandemisë, Manastirliu ka kërkuar gatishmëri të shtuar nga ana e stafeve mejkësore, ndërsa tha se pavarësisht se vaksinimi po intesifikohet, nuk duhet ulur vigjilenca për zbatimin e masave të thjeshta.
“Është një moment delikat, është një moment që kërkon shumë angazhim. Dhe kërkon që gatishmëria të jetë e shtuar, pasi, pavarësisht faktit që ne kemi filluar vaksinimin dhe tashmë përfundojmë stafet mjekësore dhe gjithashtu jemi shtrirë në grupmoshat +80 vjeç, patjetër që duhet të vijojë kujdesi i shtuar për zbatimin e masave të thjeshta”, tha Manastirliu.
Me programin e 300 qendrave shëndetësore, janë rehabilituar 20 qendra dhe ambulanca në qarkun e Durrësit, me të njëjtën cilësi, si në qendër dhe zonat periferike. /j.p/r.e/
