OBSH: Reduktimi i numrit të rasteve me COVID-19 shpëtim për Europën

KOPENHAGË, 19 shkurt /ATSH-AFP/ – Ulja e rasteve me COVID-19 në mbarë Europën është shpëtim për autoritetet, që munden tashmë të vlerësojnë përgjigjet e tyre përballë virusit dhe për të riforcuar sistemin shëndetësor, deklaroi sot drejtoria rajonale e Organizatës Botërore të Shëndetësisë (OBSH).

Për herë të parë që prej shtatorit, numri i rasteve të reja të sinjalizuara në një javë është më pak se një milion në 53 vende të rajonit europian për OBSH-në (përfshirë edhe disa vende të Azisë Qendrore), konfirmoi drejtori i OBSH Europë, Hans Kluge, në një komunikatë.

Rastet e reja janë ulur për të pestën javë radhazi, edhe pse numri mbetet ende i lartë”, shtoi ai duke theksua se edhe numri i viktimave nga COVID-19 është ulur gjithashtu për të tretën javë radhazi.

“Kur rastet me COVID-19 janë në nivele më të ulëta në shumë vende, siç është rasti tani, autoritetet shëndetësore kanë mundësi të përqendrohen në vlerësimin dhe përmirësimin e efektivitetit të përgjigjes së tyre përballë virusit”, theksoi Kluge.

Drejtoria e OBSH Europë rikujtoi se shërbimet shëndetësore, të tilla si kujdesi kundër kancerit ose programet e vaksinimit të fëmijëve, janë prekur rëndë nga pandemia e COVID-19.

“Ulja e numrit të rasteve bën të mundur që të përqendrohemi në sektorë që ishin lënë pas dore gjatë pandemisë”, shtoi Kluge.

“Është gjithashtu momenti për të përgatitur shërbimet tona për t’u kthyer në rrugën e duhur, për të hartuar strategji dhe për të furnizuar shërbimet shëndetësore përtej përgjigjes ndaj COVID-19”, deklaroi ai./ /ec/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.